Foto: Fenny

Oorlogs keend

Noe he'k nog een pa voetselbonnen
Diej wiej in oorlog toe kreegn
Veur botter en veur brood
Umme etn zat iej toe veleegn.

Moo maak ne bettiej pudding
Det smeern ziej op het brood
Want botter was niet te kriegn
De aarmood was toe groot.

Aln nachen heurn iej vleegtuugn
Diej det Duutslaand bombardeern
Mang mos ik s'nachs uut berre
Um in de kelder te logeern..

Ik sleup dan op de eerpelkiste
De V1's gung ok deur de löch
Brachn ellend toe in Engelaand
Storten doar neer kwam niet terug.

Toe haj oe huus verduuster
Veur de roetn zwat papiern
De viej-and har veurt zeng
Gin licht ok nog ginne kiern.

Va en moo han ok onderduukers
En jöden ok meansen uut verzet
Ik mos toe noa mien opoe hen
Ok al preut ik nog mar net.

As keend kon ziej oe uutheurn
Det brach een groot gevoar
Mar ik wol biej opoe niet etn
As keend hak het doar we zwoar.

Want ne keend in een oorlogstied
Ik ziej det noe op de TV
Dan denk ik an mien keenderjoarn
En leaf arg met heur mee.

Ik was toe oaveral bange veur
Veurn keend ne angstige tied
Ak op TV noe de bombardementn ziej
Raak ik det gevuul niet kwiet.

Meer berichten