Taandpiene

Foto: Fenny Martens

Wat hak ne hekel an den taandarts
Mar het mos toch ech we dizze keer
Ik har twee gaaties in mien koezen
En diej deen miej ja bassens zeer.

Toe ik biej taandarts an de beurt was
Gung ik den stool mar röstig in
Ik kreeg eerst nog we twee spuit'n
Har hoast gin geveul meer in mien kin

Ik leai in stool zo achteroaver
En boam miej was det felle licht
Ik könne doar niet in bliem kiekn
Doarum heul ik mien oogn stief dicht

Het zweet det stun miej in de haane
Toew ik den giernde boore heurn
Het triln miej hemoa deur de kaakn
'tWas of hee zo de bocht um scheurn

En toew het boren dan gebeurd was
Vuln taandarts toe mien koezen op
Doarnoa kwam hee met ne klopboor
Het goonzen miej toe deur de kop.

Ok kreeg ik deur diej nare verdoving
Ne stieve en arg skeve moond
En ik stun te bibberen op mien beene
Ik dach ik goa nog veur de groond.

Den taandarts har nog wat te verteln
Ma trugge proatn kön ik niet meer
Meesttieds bin ik ne arge kletsdeuze
Mar ik heul mien moond mar dizze keer.

Meer berichten